உன் வாய் முத்து சிந்திடுமோ

நடுங்க வைக்கும் பனி மலையில்

நீல கண்டனோடு நீ இருக்கையிலே

நிறைவோடு நாதனிடம்

வாய் திறந்து என் குறை தீர்க்க சொன்னால் 

உன் வாய் முத்து சிந்திடுமோ 

இமவான் குல விளக்கே!

அயோத்தியின் அரியணையில் 

ராமனோடு நீ இருக்கையிலே 

பரிவோடு நாயகனிடம் 

வாய் திறந்து என் குறை தீர்க்கச்  சொன்னால்
உன் வாய் முத்து சிந்திடுமோ

மைதிலியே ஜனகன் மகளே !

மேகம் கண்டாடும் மயில்மேல் 
மணாளனோடு நீ இருக்கையிலே 
மனம்விட்டு குமரனிடம்
வாய் திறந்து என் குறை தீர்க்கச்  சொன்னால்
உன் வாய் முத்து சிந்திடுமோ
வேடர் குல நாயகியே!

அரவப் பஞ்சணையில்
அரங்கனுடன் நீ இருக்கையிலே
அன்போடு மாயவனிடம்
வாய் திறந்து என் குறை தீர்க்கச் சொன்னால்
உன் வாய் முத்து சிந்திடுமோ
திருவே திருமகளே!

வெண்தாமரை மலர் மேல் 
பிரம்மனோடு நீ இருக்கையிலே
கருணையோடு நான்முகனிடம்
வாய் திறந்து என் குறை தீர்க்கச் சொன்னால்
உன் வாய் முத்து சிந்திடுமோ
வாணியே வீணாபாணியே!

மலர்கள் கொஞ்சும் பிருந்தாவனத்தில் 

கண்ணனோடு நீ களிக்கையிலே 

காதலோடு கார்முகில் வர்ணனிடம்  

வாய் திறந்து என் குறை தீர்க்கச் சொன்னால்
உன் வாய் முத்து சிந்திடுமோ

ராதையே க்ருஷ்ணப்ரியையே !