நிமிட கதைகள்
ஆன்டி வைரஸ்
டெவெலப்பருக்கு
கொரோனா பாசிட்டிவ் !
காய்கறிகள் அனைத்தையும்
விற்றுவிட்டு
குழந்தைகளுக்கு
ரசம் வைக்க ஆரம்பித்தாள்
காய்கறிக்காரி !
செல்லாத
நாணயங்கள் மட்டும்
வீட்டில் இருந்தும்
பணக்காரராகி விட்டார் ...
ஏலத்தில் விட்டு !
தவளையை
விழுங்கி கொண்டிருந்த
பாம்பின் தலைக்கு மேலே
வட்டமிட்டு கொண்டிருந்தது
கழுகு !
கோவில் வாசலில் உட்கார்ந்து
பிச்சை எடுக்கும்
பிச்சைக்காரனுக்கு தெரியவில்லை
உள்ளே போய் கடவுளிடம்
வசதியான வாழ்வை
வேண்டலாமென்று !
வலையில் சிக்கிய
கொழுத்த மீனை கண்டு
குழம்பி
காலியான வயிறையும்
காலியான பாக்கெட்டையும்
தொட்டு பார்த்தான் மீனவன் ...
விற்கவா ...
சாப்பிடவா !
இரும்பு மரங்கள்
நிறைய எழும்பின ...
இருந்தும் கூடு கட்ட
முடியவில்லை சிட்டுக்குருவிக்கு ...
செல் போன் டவர் !
மரத்தை வெட்டி
தயாரிக்கப்பட்ட பேப்பரில்
சுவரொட்டி அடித்து
ஊர் முழுதும் ஓட்டினார்கள்
மரம் வளர்ப்போம் ...
மழை பெறுவோம் !
2122
வீட்டிற்கு ஆறு
சிலிண்டர்கள்
இலவசமாக வழங்குவதாக
சொல்லியிருந்தது ஒரு கட்சி
தேர்தல் அறிக்கையில் ...
ஆக்சிஜென் சிலிண்டர்கள் !
சந்திராயனை
வெற்றிகரமாக அனுப்பிவிட்டு
மகனுக்கு தீபாவளி ராக்கெட்
வாங்க மறந்து
வீட்டிற்குள் நுழைந்தார்
இஸ்ரோ விஞ்ஞானி !
தங்கைக்கு
ஸ்கூட்டி வாங்கி கொடுக்க
முடிவு செய்தான் அண்ணன் ...
மகளை ஸ்கூலுக்கு
கொண்டு விடுவாளே !
மருந்து கடை முதலாளி
சுகர் மாத்திரைக்கு அதிகமாய்
ஆர்டர் செய்தார் ...
பக்கத்தில்
பேக்கரி கடையும்
ஆரம்பித்து விட்டார்களாம் !
நிறைய வரிகள்
இருந்தன ...
இருந்தும்
ஒருவரி கூட புரியவில்லை ...
வரிக்குதிரை !
கூகிள் மீட் இல்
பெண் பார்த்து விட்டு
வாட்சப் பில் மெசேஜ்
அனுப்பலாம் என்று
விளம்பரம் போட்டிருந்தது
மேட்ரிமோனியல் வெப் சைட் !
உங்களுக்கு
பாசமாக சமைத்து போட்டு
வளர்த்த பெற்றோருக்கு
மாத சந்தாவில்
சாப்பாடு அனுப்பி
மகிழுங்கள் என
விளம்பரம் செய்தது ஸ்விக்கி !
கொரோனா வைரஸை
ஒழிக்க மாட்டீர்களா கடவுளே
என்று வேண்டியவனிடம்
பரிதாபமாக
சொன்னார் கடவுள்...
பாவ மன்னிப்பு வழங்கவே
எனக்கு நேரம் போதவில்லை !
குழந்தை சொல்லும் பொய்யும்
அழகாக இருக்கிறது...
மிட்டாய் கேட்க மாட்டேன்
கடைக்கு என்னையும்
கூட்டிட்டு போ அப்பா !
அடுத்த நாள் காலை
ஐந்து மணிக்கு
அலாரம் செட் செய்தவுடன்
மொபைலில் வந்தது
வார்னிங் ....
உயிரோடு இருப்பாய் என்று
நிச்சயமாக தெரியுமா !
தனது மகன்
சமூக சேவகர் விருது பெறுவதை
தொலைக்காட்சியில்
அப்பா பார்த்து கொண்டிருந்தார்
முதியோர் இல்லத்திலிருந்து !
நேரத்திற்கு வீட்டுக்கு வந்து
சாப்பிடுங்க
உடம்பை கெடுத்துக்காதீங்க என்று
மனைவி சொல்லி அனுப்பினாள்
ஸ்டார் ஹோட்டல்
முதலாளியான கணவனிடம் !
பழைய சாமான்களை
கோணியில் போட்டு
சுமந்து சென்ற சிறுவனை
வியந்து பார்த்து யோசித்தான்
புத்தக பை சுமந்த சிறுவன் ...
இவன் எந்த ஸ்கூலில்
படிக்கிறான் !?
No comments:
Post a Comment